كل واحد فينا عنده صاحب، أول ما تحكيله فكرتك يقولك: «جامدة جدًا، اعملها».
وصاحبك بيحبك، وده بالظبط المشكلة¹.
لأن الإعجاب ببلاش. محدش دفع حاجة علشان يقولك «جامدة». والسوق مش بيحكم على الأفكار بالإعجاب، بيحكم عليها لما حد غريب يدّيك وقته، أو إيميله، أو فلوسه.
وهكون صريح معاك: أغلب الأفكار اللي بتقع مش بتقع عشان وحشة. بتقع عشان محدش اختبرها قبل ما يصرف عليها شهور تطوير وبضاعة وإعلانات.
علشان كده عملت مدرب التجارب.
ده إيه بالظبط؟
مهارة AI مجانية بتركّبها مرة واحدة في الشات اللي بتستخدمه، Claude أو ChatGPT أو Gemini، وبعدها تكلّمها عادي بالعربي: «عايز أختبر فكرتي قبل ما أبنيها». وهي بتسألك الأول عن اللي محتاجه: مين العميل، وبكام هتبيع، وهتوصله إزاي. وبعدها بتمشي معاك في 4 مراحل، كل مرحلة بتطلب من الناس حاجة أكبر من اللي قبلها: وقتهم، وبعدين بياناتهم، وبعدين ضغطة، وبعدين فلوسهم.
المرحلة الأولى: اتكلم مع العملاء
تقعد مع ناس من عملائك المحتملين، وتسألهم عن آخر مرة واجهوا المشكلة وعملوا فيها إيه. مش عن رأيهم في فكرتك. والمهارة بتكتبلك الأسئلة بالعامية، ولما ترجعلها بالإجابات تلخّصهالك. وهنا بتعرف: هل المشكلة حقيقية ومضايقاهم فعلًا؟
المرحلة التانية: صفحة وقائمة انتظار
صفحة بسيطة بتشرح الفكرة وفيها خانة تسجيل، وتوصّلها بإعلان صغير لناس متعرفهمش. والمهارة بتكتبلك كلام الصفحة والإعلانات، وبتحسبلك تصرف قد إيه علشان النتيجة تبقى ليها معنى. وهنا بتعرف: هل ناس غريبة مهتمة كفاية إنها تسيب بياناتها؟
المرحلة التالتة: زرار لميزة جاية
دي لو عندك منتج أو موقع شغال. بتحط زرار للميزة الجديدة قبل ما تبنيها، واللي يضغط يعرف إنها جاية قريب ويسيب إيميله. وهنا بتعرف: هل الناس بتختارها فعلًا وهي بتستخدم منتجك؟
المرحلة الرابعة: بيع قبل ما تبني
بتعرض الفكرة بسعر خاص لأول العملاء، بعربون بيرجع كامل لو ما سلّمتش في المعاد. وخد بالك لو بتبيع بالدفع عند الاستلام: الأوردر اتأكد، الفلوس لأ. علشان كده المهارة هتخليك تاخد عربون مدفوع، مش أوردر. وهنا بتعرف أهم حاجة: هل هيدفعوا فعلًا، ولا بيقولوا إنهم مهتمين وخلاص؟
الجزء اللي محدش بيعمله
قبل أي اختبار بتتفقوا على القرار: لو وصلنا لكذا نكمّل، ولو أقل من كذا نوقف. والاتفاق ده بيتكتب قبل ما تشوف أي رقم، علشان محدش يفسّر النتيجة على مزاجه بعدها، وأولهم إنت. وبعد كل مرحلة بتقولك واحدة من تلاتة: كمّل، أو غيّر حاجة واحدة بس وجرّب تاني، أو وقّف.
ومش هتقولك أبدًا «التجربة دي هتزوّد مبيعاتك 30%». أي رقم بتذكره ليه مصدر، وغير كده بتقولك تقيس رقمك إنت إزاي.
وبعد ما تطلق؟
بتكمّل معاك برضه. فيها 32 فكرة تجربة جاهزة حسب نوع البيزنس، وبتحسبلك اختبارات A/B قبل ما تبدأها، وبتمسك معاك سجل بكل تجربة واتعلمت منها إيه.
تبدأ إزاي؟
لو بتستخدم Claude Code، هما أمرين:
/plugin marketplace add growthack88/growth-marketing-os
/plugin install experiment-coach@growth-marketing-osولو على ChatGPT أو Gemini أو تطبيق Claude، الخطوات كلها في الصفحة، ومعاها برومبت البداية جاهز تنسخه.
growthhackacademy.com/experiment-coach
وهي مجانية ومفتوحة على GitHub، وتقدر تستخدمها حتى في شغل العملاء.
P.S. لو جرّبتها على فكرة والنتيجة طلعت «وقّف»، رد على الإيميل ده واحكيلي. الفكرة اللي اتقفلت بدري وفّرت عليك فلوس محدش هيعدّها، وده نجاح برضه، بس من النوع اللي محدش بيعمله بوست.
