مفيش حاجة اسمها تفاوض - اللي معاه المسدس مش بيتفاوض

التفاوض كذبة.. لحد ما يبقى معاك حاجة

من ٢٤٠٠ سنة الجيش الأثيني حاصر جزيرة صغيرة اسمها ميلوس وطلب منهم الاستسلام

أهل الجزيرة قالوا: “احنا مسالمين.. ومحايدين والعدالة في صفنا واكيد مش هيعملولنا حاجة”

رد الأثينيين عليهم بجملة اتسجلت في التاريخ كتبها المؤرخ ثوسيديديس

“العدالة بتتوجد بس بين أطراف متساويين في القوة غير كده القوي بيعمل اللي يقدر عليه والضعيف بيتحمل اللي لازم يتحمله”

ووقتها الجزيرة رفضت الاستسلام والنتيجة انها اتمسحت من الوجود :D

ومؤخرا لقيت مقوله قدامي بتقول

“If you hold a gun and I hold a gun, we can talk about the law.
If you hold a knife and I hold a knife, we can talk about rules.
If you come empty-handed and I come empty-handed, we can talk about reason.
But if you have a gun and I only have a knife, then the truth lies in your hands.
If you have a gun and I have nothing, what you hold isn’t just a weapon — it’s my life.”

يعني لو أنا معايا مسدس وانت معاك مسدس..
ممكن نقعد نتكلم عن القانون

ولو أنا معايا سكينة وانت معاك سكينة..
ممكن نتكلم عن القواعد

لو إحنا الاتنين داخلين بإيدينا فاضية..
ممكن نتكلم بالعقل والمنطق

بس لو انت معاك مسدس وأنا معايا سكينة..
“الحقيقة” هتبقى هي اللي انت شايفها

ولو انت معاك مسدس وأنا إيدي فاضية..
فاللي في إيدك ده مش سلاح.. ده حياتي

كل ما بفكر في المقولة دي بحس إنها بتشرح جزء كبير جدًا من الحياة اللي حوالينا

لأن جزء كبير من اللي بنسميه:

قوانين وقواعد وتفاوض وعدالة وحتى المنطق..

كلهم محتاجين قبلهم حاجة محدش بيجيب سيرتها

وهي توازن القوة.

وخد بالك.. ده مش معناه إن القوة “صح” ولا إن الأقوى دايمًا عنده حق

بالعكس تماما

ده معناه حاجة أبسط:

انه علشان تتفاوض أصلًا لازم يبقى عندك حاجة تخلي الطرف التاني محتاج يتفاوض معاك

من غيرها اللي بيحصل على الترابيزة اسمه أي حاجة تانية.. إلا تفاوض

---

دلوقتي يابن عمي سيب المسدسات والسكاكين وشوف نفس الصورة في شغلك:

لو عندك عميل واحد بيمثل 80% من دخلك؟
انت هنا مش بتتفاوض معاه على السعر هو لمؤاخذة اللي بيحدد السعر

ولو مثلا شركتك محتاجة المستثمر أكتر بكتير ما هو محتاج الصفقة؟
شروط الاستثمار مش هتكون في صالحك وهيتكتب بلغة اللي معاه الـ leverage مش اللي انت عايزه

ولو عندك عرض شغل واحد ومحتاجه بأي تمن؟
قدرتك على التفاوض على المرتب هنا شبه معدومة.. مهما كنت شاطر في الكلام

في كتاب Getting to Yes أشهر كتاب اتكتب عن التفاوض الباحثين في هارفارد سموا الفكرة دي BATNA:

Best Alternative To a Negotiated Agreement

يعني: إيه أحسن حاجة هتعملها لو الصفقة دي ضاعت منك؟

وخلاصة أبحاثهم كلها في سطر واحد:

قوتك في أي تفاوض مش بتيجي من ذكائك ولا من أسلوبك ولا من الـ presentation بتاعك..

قوتك بتيجي من جودة البديل اللي مستنيك برة الأوضة اللي بتتفاوض فيها

اللي عنده بديل قوي بيتفاوض وهو مرتاح
اللي معندوش بديل.. بيترجى ويتحايل حتى لو شكله بيتفاوض

---

علشان كده لما يبقى عندك 3 عملاء مستنيين..
أو 2 offers على الترابيزة..
أو أكتر من مستثمر مهتم..
أو ببساطة القدرة إنك تقول: “لأ، شكرًا.”

هنا بس بيبدأ التفاوض الحقيقي

يمكن علشان كده واحدة من أهم الحاجات اللي ممكن تبنيها في البيزنس وفي حياتك بشكل عام مش الفلوس ولا العلاقات ولا حتى الخبرة

إنك تبني لنفسك Options

لأن أقوى حاجة على ترابيزة التفاوض..

مش اللي معاك

هي قدرتك إنك تقوم من على الترابيزة.. وتمشي

---

**معلش الايميل فلسفي شوية الاسبوع ده بس حصل قدامي كام موقف وكان لازم اتكلم عنه